نبذة عن اللاعب(ليــــ ميسي ــــونيل)

من هو MESSI


Lionel Andrés

Messi ليو ميسي
اللاعب اللي وصل للشهره باسرع وقت يعني عمره 18 و شهرته الحين تقارن في شهرة اكبر اللاعبين مثل رونالدينهو و زيدان
المهم خلنا نشوف وش قصته




بطاقة الاحوال ( اقصد البطاقة الشخصية)
الاسم : ليونيل اندريس (آل) ميسي
ظهوره للدنيا : عام 1987 شهر 6 يوم 24 (< == يعني قبل سنتين كان يمديه يدخل ملاهي الخيمه)
مكان الولاده : (في مستشفى الشميسي) روساريو ,الارجنتين
الطول : 170
الوزن :67
النادي : العداله – الحساء ( < == اكيد برشلونه اسبانيا) الموهبه و المرض
ميسي بدا يطق طق كوره من يومه بزر عمره 5 سنين في نادي “كلوب جاندولي” النادي اللي ابوه جورج كان يشتغل فيه او يديره و بعدها
راح لنادي المنطقه نفسها و اسم النادي “نيو ويلس اولد بويس” و كان اخوه رودريجو يلعب في نفس النادي

المهم الرجال لعب لين سنة 2000وكان مدربه في ذاك النادي انريكي دومينكيز يدري ان ذا الاعب بيسوي شي و كان يقول ” ميسي عنده موهبه
تتحدى قوانين الفيزيائيه للجسم . والشخص الوحيد اللي فيه هذي الموهبه هو ديجو مارادونا” استمر ميسي لين وصل عمر 13 و كان خلاص بيروح لريفر بليت لكن….
اكتشفو مرض في ميسي و هونقص في هرمونات العظام واللي يتسبب في ضعف النمو …
و طبعا العلاج يعتبر مكلف على نادي نيو ويلس و حقين ريفير بليت هونوا … و ابو ميسي ورط لانه ما يقدر يوفر العلاج …..

وش الحل يا ابو ليو ؟
طبعا ابو ليو قال ما بدهاش خلني اكلم عيال عمي في اسبانيا او بالتحديد في ليديا في وسط كاتلونيا… و بعدها اقنعوا حقين برشلونه انهم يجربونه
بعد ما استفسرو من احد كشافين برشلونه في الارجنتين.
جا ميسي و اهله لبرشلونه عشان يجربونه .التجربه الاولى
في اول تجربه في مباراة لناشئين برشلونه و كان عمره 13 و طوله 140 سم وقتها
وش تتوقعون سوا ؟؟
جاب هدف ؟ لا
هدفين ؟لا لا
ثلاثه ؟ يعني هاتريك برضو لا
اجل وش سوا 5 اهداف ذا القروي في اول مباراة
طبعا قالو بسرعه اقرب مستشفى عشان نعالجه و بعدها تكفل النادي في علاج الاعب و وقعوا معاه العلاج و البدايه

وكان العلاج يكلف 750 يورو في الشهر(يعني 4 الاف ريال تقريبا)
و برشلونه تكفل فيه لين صار الحين طوله 170 سم
و بعد ما دخل لناشئين برشلونه سجل الجبيب 37 هدف لين صار انتقل لفريق لبرشلونه “ب”
منتخب اسبانيا طلب ميسي عشان يكون في منتخبهم للشباب ويعطونه الجنسيه لانه هو يستحقها
لكن ميسي قال لا ابي العب للارجنتين و لعب اول مباراة ضد الباراجوايمع الفريق الاول


ميسي ما طول ميسي في برشلونه بي لان في اخر موسم 2004\2005 ريكارد احتاج لاعب يغطي نقص المهاجمين
اللي عنده بعد اصابة لارسون و ماكسي و كان ميسي مبدع مع فريق “ب”
واستدعا ريكارد ميسي و كانت اول مشاركه ضد اسبانيول في اخر الدقايق و فاز برشلونه في هذي المباراة
1-0 لكن ميسي ما امداه يسوي شي
طبعا ميسي قد لعب قبل مع الفريق الاول في مباراة وديه ضد بورتوالبداية

في اخر مباريات الموسم 2005\2004 شارك ميسي في اخر 5 دقايق ضد الباسيك و كسر رقم جديد و صار اصغر
لاعب يجيب هدف في الدوري الاسباني في تاريخ برشلونه
بعد ما جاب الهدف الثالثوكان في هذي المباراة شي يضحك و هو ان اول ما دخل ميسي في الدقيقه 41 حطله رونالدينهو كوره و ميسي انفرد
و حطها من فوق الحارس لكن الحكم حسبها تسلل و هي هدف صحيح مافيه اي تسلل
و جا الحارس يطببطب و يدلع .. اقصد يحط يده على راس ميسي
و قصده اثقل توك صغير
بس الحارس نسى ان باقي 3 دقايق
و نفس الكور من رونالدينهو و الوقح ميسي كان يمديه يحطها في الباب عادي لكن
من فوق الحارس زي الكوره اللي قبلها
وهذي تعتبر بداية ميسي في ذاكرة جمهور برشلونهكاس العالم للشباب
اوووووه يا ميسي .. وش سويت في كاس العالم اخذ كل شي ما بقى ياخذ الا جائزة الجمهور المثالي
طبعا تسبب في خروج اسبانيا
و البرازيل المرشح الاول .. جاب هدف و صلح الثاني ..مع ان مدرب البرازيل صرح قبل المباراة ان “ميسي مصدر قوة الارجنتين
لكن باعرف كيف اتعامل معاه”
خخخخخخخخخخخ اجل 2-0 هذا و انت عارف تتعامل معاه .. اجل لو ما تعرف كم بتكون !!؟؟



واخيرا نيجيريا اللي كانت افضل فرق البطوله لكن ذكاء ميسي عرف كيف يكسب بلنتي .. و احرز هدفين الفوز في النهائي

طبعا غير ان اخذ مع منتخبه كاس العالم للشباب

اخذ جائزة افضل لاعب في البطوله


و هداف البطوله بعد

مباراة اليوفي في كاس جامبر


لعب برشلونه ضد اليوفي في مباراة على كاس جامبر و شارك في هذي المباراة ميسي و طبعا ميسي انهبل في هذي المباراة
و تعب فييرا لين اضطر فييرا انه يلعب بخشونه و اخذ كرت اصفر و طبعا انك تحاول تسوي شي قدام فريق مثل اليوفي
و محور مثل فيرا و انت عمرك 18 هذا شي كبير
طبعا كابيلو بعد المباراة قال” ابي اعرف كيف انخلق ميسي”
وقال ” انا في الملعب تكلمت مع ريكارد وقلت اذا انت ماراح تلعبه خله يجينا و احنا ننمي
موهبته لك “ و كان يستهبل مع ريكارد اللي قاله لا معليش هذا لاعبنا وقال كابيلو
“انا لما قلت ننمي موهبته كنت امزح لان ميسي ما يحتاج احد ينمي موهبته لانه لاعب كبير في الملعب
و اللي يميزه انه برا الملعب شخص نظامي و ما تحس ان عمره 18 “

برشلونه و المشكلة في مشاركة ميسي
ميسي بعد كاس العالم للشباب خلاص ضمن انه يكون في الفريق الاول ووقع معاه النادي لين 2014 و قيمة فسخ العقد 150 مليون يورو لكن ميسي واجه مشكله اعتباره مواطن اسباني لكن فيه قانون يقول ان الاعب اذا مر على مراحل النادي السنيه من ناشئين و شباب
يعتبر لاعب من نفس النادي و ما يعتبر محترف لكنه شارك في التشامبيونز ليج وماكان عنده مشاكل وشارك اول مباراة
ضد اودينيزي الايطالي وقدم مستوى كبير





لكن في الدوري الاسباني احتجت الفرق الاسبانيه على مشاركته و في راسهم رئيس نادي الافيس وعلق الاتحاد السباني مشاركه ميسي
لين سبتمبر عشان يبحثون الموضوع
واخيرا وافقوا انه يلعب و كان ميسي يلعب في اخر الشوط الثاني يعني ما كان اساسي , جولي هو الاعب الاساسي لين ما جت مباراة مدريد.

مدريد و الاثبات


طبعا في البدايه كثير شككوا في امكانيات ميسي و اللي يقول انه فقاعه صابون (ما يقصد احد هنا) و الي يقول ان صحافة برشلونه
و جمهوره هم اللي طيروا فيه و هو لاعب عادي
جت مباراة مدريد و ميسي كان مفروض يكون احتياط لجولي لكن في التسخين جولي جاه شد عضلي(شكل ميسي حاط عمل تحت مخدة جولي)
و اضطر ريكارد انه يلعب ميسي في هذي المباراة الكبيره
لكن ميسي ما خيب ضن ريكارد و لعب مباراة اثبت للناس انه جاي بقوه
كان قدام (روبيرتو كارلوس) لكن اثبت نفسه و تعب كارلوس
و كان من افضل نجوم المباراة … و جاه المدح من جمهور الريال قبل جمهور برشلونهقالوا عن ميسي

وبعد مباراة مدريد صرح كرويف وقال “انا كنت منزعج من سرعه شهرة ميسي وكيف صار معشوق
الجماهير بهذي السرعه و كأن عشق ميسي مرض و انتشر في برشلونه لكن بعد مباراة مدريد شكلي انا تعاديت بمرض عشق الاعب ميسي”



و مارادونا قال ” ميسي هو خليفتي و هو امل الارجنتين في كاس العالم”
(< == ماترك احد ما قال عنه خليفتي سافيولا و اورتيجا و الحين ميسي .. كنه ماجد عبدالله حسين هادي و الدحيدح و علي يزيد)

ريكيلمي “ميسي يعتبر احد مصارد قوة الارجنتين في كاس العالم”

ميلوتو مدافع سرقسطه “صعب تقطع الكوره من ميسي بالطرق الشرعيه”

بكيرمان ” ميسي جوهرة الارجنتين و يجب ان نحافظ عليه “

فيجو “ميسي و رونالدينهو بيكونون نجوم كاس العالم”

كابيلو ” اتمنى ان ادرب ميسي في يوم من الايام”

دروجبا “ميسي لاعب موهوب و من افضل الاعبين الان و هو اضاف قوه لبرشلونه”

و كثيير من الاعبين و النقاد و الصحفين و اعضاء الاقلاع مدحوا ميسي و قالو انه هو الاسطوره القادمه (< == وش رايكم فيني يوم دخلتكم )

وبعدييين معاك يا ميسي

بعد مباراة مدريد ميسي صار من اعمدة برشلونه و اثبت انه من افضل الاعبين في العالم و حصل على جائزة افضل لاعب شاب في العالم
و استمر ميسي في العب بفن و صار له ناس يتابعون برشلونه عشان ميسي و بالذات في الارجنتين انتشر جنون ميسي

ميسي تشيلسي



طبعا جت مباراة دور ال16 في التشامبيونز ليج قدام تشيلسي وهذي المباراة تعتبر نقطة تحول و من مرحلة لاعب صغير موهوب
الى تصنيف لاعب كبير مهبول و اثبت ان اللي يقول مستحيل يجي ماردونا جديد غلطااااان
طبعا في هذي المباراة ميسي انطق طق و انلعب فيه لكن ميسي ما في شي ما سواه في هذي المباراة الا انه يجيب هدف
و انطرد ديل هورنو في هذي المباراة بعد ما بغى يقتل ميسي في كم كوره دخل علي دخلات بس ربي ستر
بعد المباراة مورينهو و الصحافه الانجليزيه ما تركو شي ما قالوه عن ميسي و انه ممثل و انه “كلب وصخ” زي ما قالت جريدة “ذا سن

هنا واضحه الضربه لكن “ذاجاردين” الجريده البريطانيه قالت لان مورينهو انهزم فحط عذره ان ميسي يمثل و ديل هورنو ما يستاهل الطرد و هذا اللي خلاهم ينهزمون !!!!
,و هذي تاثير اصابة ميسي في المباراة اللي بعدها واللي يقول مورينهو انها تمثيل


وانشالله ينال اعجابكم


مع اجمل تحيه وطيبه مني لكم

اخوووكم :

Fo0ox

مشكور اخوي
واصل ابداعك

اكيد ميسي لاعب كبير ويستحق كل شي


قلب الاسد

تسلموا ع المرووووووووووووووور شباب